Najbolja teniserka svijeta plasirala se u drugo kolo Vimbldona. Poljakinja Iga Švjontek (Swiatek) slavila je rezultatom 2:0 protiv kineske teniserke Džu Lin (Zhu) na „Terenu broj 1“ i uspješno započela nastup na Gren slemu na kojem je dosad imala najmanje uspjeha.

Bilo je 6:1, 6:3 za 22-godišnju teniserku iz Varšave. Duel je trajao 81 minut, ali je bio prekinut krajem drugog seta zbog kiše u Londonu, kako bi se navukao krov.

Dominantna je bila u prvom setu, gdje je napravila dva brejka, a potom i u šestom gemu na servis Kineskinje imala dvije set-lopte. 

Nije ih iskoristila, ali je u narednom gemu lako došla do prednosti. U drugom setu je jači otpor pružila 34. teniserka WTA liste. Viđena su tri brejka u nizu od trećeg do petog gema, ali je poslije pauze Švjontek sigurno privela meč kraju.